SAKOTRET KAYU API NU NGADURUK SUMANGET KREATIPITAS, bagean I

Lalakon Pentas Seni Budaya teh asa geus jadi kadaharan anu matuh tur geus jadi kabiasaan. Kusabab hal eta, sakapeung sok kajongjonan, da eta ngarasa yen ketak teh asa geus sataker kebek, asa geus boga kontribusi pikeun nanjeurna seni budaya sunda. antukna mindeng kapohokeun malahan mah remenna dipopohokeun yen sabenerna aya keneh pe-er pikeun urang salarea anu ngokolakeunna. atuh nu jadi pe-er teh nyaeta kumaha carana saba'da eta seni budaya teh nanjeur ajenna, para pelaku senina oge bisa terus neruskeun hirup tur huripna ngaliwatan kesenian anu digarapna.

Pikeun neruskeun hirup tur hurip teh kapan seniman tangtu perlu nyukupan sakabeh pangabutuhna boh kabutuhan batin, nyaeta kepuasan tea komo deui kabutuhan lahir nyaeta ngaronjatna harkat jeung martabat seniman dina widang ekonomi. hal iyeu tangtos patali jeung pendapatan anu dipibanda ku seniman unggal maranehna meunang job atawa orderan atawa nabeuh.

Tah kumargi kitu ari hoyong seueur nu ngangken kanggo nabeuh mah kapan garapan seni nu urang teh kudu motekar, kudu kreatip ulah sarua jeung batur. sabab lamun garapan urang sarua keneh jeung garapan batur, geus tangtu kudu milu ngantri dina antrian job nabeuh nu teuing iraha bakal gilir ka urangna.

kreatip teh lain hiji hal anu gampang pisan diucapkeunna tapi bangga banget dina ngarealisasikeunna. hal eta kapanggih basa kuring padungdengan jeung salah sahiji dulur anu pagaweannana dina widang pariwisata. kuring mah ngarasa reueus basa nempokeun ka manehna naon anu jadi ketak kuring saparakanca di DAPSENBUD kota Bandung ngaliwatan Pentas Seni Budaya Kreatif 2013.Naha gening ceuk manehna mah eta teh can asak, can hatam lamun seug rek dipintonkeun jang para wisatawan asing tur domestik mah komo mun di bandingkeun jeung pintonan-pintonan di Bali mah.sabab cenah ceuk manehna lamun dilarapkeun kana kadaharan mah pintonan di Pentas Seni Budaya Kreatif 2013 teh masih keneh masing-masing, masih keneh leunca, bonteng, kacang panjang, surawung, jeung sambel kacang acan jadi KAREDOK.

Naha bet kudu dijadikeun KAREDOK atuh?, sabab lamun geus jadi KAREDOK mah tangtu hargana leuwih mahal jeung deui leuwih ngeunah we ngadaharna ge.kumaha atuh supaya eta pintonan teh bisa jadi KAREDOK? tah ngeunaan hal eta bakal dipedar deui dina tulisan anu salajengna, sabab mamang rek ka cai saheulaanan....